15 ang naitalang nasawi kabilang na ang isang sundalo sa naganap na mistaken ambush sa Northeastern India.
Base sa imbestigasyon, nagsasagawa ng Counterinsurgency Operations ang mga sundalo sa Oting Village ng Mon District sa border ng Myanmar kung saan, napagkamalang Separatist Militants at agad na pinaputukan ng mga nagpapatrolyang security forces ang isang truck sakay ang nasa tatlumpung minero na papauwi na sana galing sa kanilang trabaho.
Dahil dito, nagalit ang mga residente ng mabalitaan ang insidente dahilan para kanilang palibutan ang kampo ng mga sundalo at sinunog ang mga sasakyan nito.
Nabatid na hindi ito ang unang pagkakataon na nagkamali ng target ang mga sundalo ng india sa mga inosenteng tao sa kanilang mga operasyon.
Samantala, ikinalungkot naman ni Home Minister Amit Shah ang pangyayari at nangakong magsasagawa ng malalimang imbestigasyon matapos ang maling pag-ambush ng mga sundalo. —sa panulat ni Angelica Doctolero