Natataon dahil kamakailan lamang ay naungkat at napaguusapan sa mababang kapulungan ng Kongreso ang umano’y kabiguan ng Department of Transportation and Communication (DOTC) ang pagtatayo ng palikuran o comfort rooms sa ilang pampublikong lugar tulad ng istasyon ng tren, pantalan, paliparan o terminal sa ilalim ng “Kayo ang Boss Ko Toilet Project” na nagkakahalaga ng higit-kumulang tatlong-daang milyong piso (P351-milion).
Ika nga ni Abakada Partylist Representative Jonathan dela Cruz, hindi lamang ito may bahid ng anomalya, ito rin daw ay kahindik-hindik at nakakagulat at kinasusuklaman.
Bakit kanyo, dahil may nakalaang budget na pala ito para sa pagtayo ng bagong palikuran at pagsasa-ayos ng mga lumang banyo, ay hindi raw ito naisakatuparan kung kaya’t kawawa ang ating mga kababayan dahil sa may kakulangan talaga sa mga CR sa bawat government installation o facilities.
Kaya naman napapanahon ang aking pag-obserba sa mga lugar na dagsa ang mga mamamayan natin, lalong-lalo na ang mga babae, kung saan kapag tinawag sila ng kalikasan, naku po, aabutin na yata sila sa pila, kung hindi mapapaihi sa kanilang pantalon, aba ang masaklap ay aabutin na rin sila sa pagdudumi.
Ang nakaka-awa pa yaong mga matatanda na ilang oras sila munang pumila bago maka-upo at mailabas ang tawag ng kalikasan.
Yan ba ang tinatawag na tuwid na daan, at may malasakit sa ating mga kapwa?
Naku naman, mabuti’t nasilip ito ng mga mambabatas at ng Commission on Audit dahil kung hindi ay siguradong magtitiis na naman ang ating mga kababayan.
Kaya naman, uulitin ko, kapag may gagawing proyekto ang ating pamahalaan para sa mga pampublikong pasilidad tulad ng airport, pantalan, at istasyon ng tren at maging mga tanggapan ng gobyerno, pwede ba, bago niyo aprubahan ang plano ng mga kontraktor, paki silip muna ang mga palikuran.
Dapat ay damihan ang palikuran para sa mga babae, kung maari ay gawin itong tatlo upang ma-accommodate ang lahat at wala na tayong nakikitang pumipila ng-kilokilometro ang mga ito.
Tandaan natin, kayo ang nasa gobyerno, kaya marapat lamang na bigyan ng sapat na serbisyo ang ating mga Boss.
