Ipinababasura ng depensa ni Vice President Sara Duterte ang hiling ng House Prosecution panel na ipa-subpoena ang bank at tax records ng Bise Presidente at kanyang mister na si Atty. Manases Carpio.
Sa ika-anim na araw ng impeachment trial, inilatag ng defense at prosecution teams ang kanilang ligal na posisyon kaugnay sa pag-prisenta sa financial records ni VP Sara sa paglilitis.
Iginiit ni Defense Counsel Atty. Michael Poa na walang sapat na batayan ang naturang kahilingan ng prosekusyon dahil mali ang proseso at inuuna anyang magbintang bago maglatag ng matibay na ebidensya.
Binigyang-diin ni Atty. Poa na ang paglalabas ng subpoena para sa financial records ay maaaring lumabag sa mga probisyon ng Anti-Money Laundering Act, Tax Code, at Bank Secrecy Law na nagbibigay ng proteksyon sa pagiging kumpidensyal ng naturang mga dokumento.
Bahagi ng pahayag ni Defense Counsel Atty. Michael Poa sa oral arguments ng senate impeachment court kaugnay sa pag-subpoena sa tax records ni Vice President Duterte. | mula sa panulat ni Jordan Gutierrez
