Iniutos na ng Sandiganbayan ang pagpapalipat ng kustodiya ni Sen. Rodante Marcoleta sa Quezon City Jail Male Dormitory sa Payatas.
Ito’y matapos iulat ni University of the Philippines-Philippine General Hospital (UP-PGH) Director Dr. Gerardo Legaspi na normal na ang kondisyon ni Sen. Marcoleta matapos ang isinagawang independent medical examination kahapon.
Sa pagdinig ng korte ngayong araw, sinabi ni Dr. Legaspi na wala nang sintomas ng mild pneumonia ang senador at kontrolado na rin ang kanyang hypertension.
Nauna nang naiulat na nanatili si Sen. Marcoleta sa PNP General Hospital mula nang maaresto noong Hulyo 6 matapos siyang makaranas ng karamdaman.
Inirekomenda naman ni Dr. Legaspi na mahiwalay muna ang senador sa iba pang detainees habang patuloy na inoobserbahan ang kanyang kalagayan, lalo na dahil sa kanyang edad.
Mag-iinspeksyon ang korte sa Quezon City Jail sa Payatas matapos kuwestiyunin ng abogado ni Marcoleta kung makaaapekto sa kalusugan ng senador ang kondisyon ng pasilidad sakaling doon siya ilipat.
Ayon kay Associate Justice Karl Miranda, hindi siksikan ang kulungan at may mga health personnel na maaaring magpatuloy sa pagbibigay ng kinakailangang gamot sa senador.
Samantala, sa pagdinig ay naghain ng not guilty plea ang mga kapwa akusado na sina dating congressman Mike Defensor at mga negosyanteng sina Joseph Espiritu at Aristotle Viray.
Hindi pa naman nababasahan ng sakdal si Sen. Marcoleta dahil sa nakabinbing motion to quash o hiling na ibasura ang kasong plunder na isinampa laban sa kanya.
Itinakda ng korte ang pre-trial sa Agosto 10, habang sa Hulyo 28 at 29 naman gaganapin ang pre-marking of evidence.
Sa ngayon, nananatili pa si Sen. Marcoleta sa Sandiganbayan habang mahigpit ang ipinatutupad na seguridad sa loob at labas ng korte kaugnay ng kanyang pagharap sa pagdinig. | via Jenn Patrolla (Patrol 38)
