Ilalabas ni Pangulong Rodrigo Duterte ang pangalan ng mga police officers na sinasabing sangkot sa iligal na droga sa kanyang pagbabalik bansa mula sa biyahe sa Russia.
Ito ang inihayag ni Senador Christopher Bong Go, matapos aniya nilang makapag-usap ng pangulo.
Ayon kay Go, hawak na ni Pangulong Duterte ang listahan ng mga ‘ninja cops’ bagama’t meron pa aniya itong pinatitingnang impormasyon.
Si Pangulong Duterte ay nakatakdang magtungo ng Russia mula Oktubre 1-5 kung saan makikipagkita ito kay Russian President Vladimir Putin.
Samantala, una nang sinabi ni Senador Richard Gordon na kanila nang ipalalabas sa Martes, Oktubre 1 ang pangalan ng mga tiwaling pulis na isiniwalat ni dating CIDG chief at ngayo’y Baguio City Mayor Benjamin Magalong na sangkot anito sa pagrerecycle ng iligal na droga.
Nakatakda rin aniyang magkaharap-harap si Magalong at ilan sa mga tinukoy nitong police officers na sangkot sa kontrobersiya sa pagdinig ng Senado sa Martes.
