Pinabulaanan ng Malacañang na may impluwensya si Pangulong Ferdinand Marcos Jr. sa imbestigasyon ng National Bureau of Investigation kaugnay ng reklamong isinampa laban kay Vice President Sara Duterte.
Ito ang tugon ng Palasyo matapos igiit ng isa sa mga abogado ng depensa sa impeachment trial na nasa ilalim ng Department of Justice ang NBI, na bahagi ng Executive Department na pinamumunuan ng Pangulo.
Ayon kay Palace Press Officer Usec. Claire Castro, matagal nang nasa ilalim ng DOJ ang NBI at may sarili itong mandato sa pagsasagawa ng mga imbestigasyon.
Kaya ang pag-uugnay aniya kay Pangulong Marcos sa naturang imbestigasyon ay isang napakababaw na argumento.
Binigyang-diin ni Usec. Castro na hindi lamang isa o dalawang tao ang nakasaksi sa pagbabanta laban kina Pangulong Marcos, First Lady, at dating House Speaker Martin Romualdez, kundi maging ang publiko, kaya tungkulin aniya ng NBI na imbestigahan ang naturang pahayag ng bise presidente.—sa panulat ni Jordan Gutierrez
