Iginiit ni Palace Press Officer Undersecretary Claire Castro na hindi katanggap-tanggap ang depensa ng kampo ni Vice President Sara Duterte kaugnay sa pagbabanta kay Pangulong Ferdinand Marcos Jr.
Ito’y matapos igiit ng defense team na ginawa ng bise presidente ang naturang pahayag bilang isang nag-aalalang ina sa kanyang seguridad, at hindi bilang pangalawang pangulo.
Gayunman, inihayag ni Usec. Castro na hindi nababago ng anumang paliwanag ang bigat ng isang pagbabanta laban sa isang personalidad.
Binigyang-diin ng Palace official na dapat tingnan ang usapin batay sa mismong nilalaman ng mga naging pahayag at hindi sa personal na katayuan ng sinumang nagbitiw ng pagbabanta.—sa panulat ni Jordan Gutierrez
