Ilang lugar sa Quezon City ang nalubog sa baha matapos ang malakas na pag-ulan kagabi.
Ayon sa lokal na pamahalaan ng QC, hanggang baywang ang baha sa ilang lugar sa barangay Quirino 2B at barangay Damayan.
Hanggang tuhod ang baha sa ilang kalsada sa barangay North Fairview, Barangay E. Rodriguez, barangay Katipunan, at barangay Vasra.
Hanggang gutter naman ang bahang naranasan sa ilang lugar sa barangay Holy Spirit, Barangay Loyola Heights, Barangay Claro, at Barangay Kanluran.
May ilan ding lugar sa lungsod Quezon na nakaranas ng baha, ngunit nawala rin kalaunan.
Samantala, may naiulat ding hanggang gutter na baha ang Metropolitan Manila Development Authority (MMDA) sa Elliptical Kalayaan sa Quezon City at sa EDSA Ortigas service road sa Mandaluyong City. | mula sa panulat ni Anjo Riñon
