Mahigpit ang kautusan ng Department of Justice sa mga tauhan ng Bureau of Immigration, partikular sa mga nakatalaga sa mga airport na maging alerto sa posibleng paglabas sa bansa ng ilang mga personalidad na isinasangkot sa flood control anomaly.
Ayon kay Justice Spokesman, Atty. Polo Martinez, kasunod ito ng pag-isyu ng Manila Regional Trial Court, Branch 52 ng hold departure order laban sa mga sinasabing sangkot sa anomalya.
Nilinaw ni Atty. Martinez na hindi pa nareresolba ang mga reklamong nakabinbin sa D.O.J. laban sa mga idinawit sa nasabing anomalya, kaya tanging layunin lang anya ng kautusan na pigilan ang posibleng pagtakas ng mga respondents.
Kabilang sa pinagbabawalang lumabas ng bansa si Senador Jinggoy Estrada, dating Department of Public Works and Highways Secretary Manuel Bonoan, dating DPWH Usec. Roberto Bernardo, at mga dating district engineers na sina Henry Alcantara at Gerard Opulencia.
