Muling pinagtibay ng Presidential Task Force on Media Security (PTFOMS) ang pangako nitong protektahan ang mga mamamahayag at itaguyod ang katarungan para sa mga biktima ng karahasan na may kinalaman sa media, kasabay ng paggunita ng bansa sa ika-labing anim na anibersaryo ng Maguindanao Massacre noong 2009.
Ipinahayag ng PTFOMS ang pakikiisa nito sa mga pamilya ng limampu’t walong biktimang nasawi sa pinakamalupit at pinakamadugong pag-atake sa mga media worker at isa sa mga kaso ng karahasang may kinalaman sa halalan sa kasaysayan ng Pilipinas.
Nag-alay ng pagpupugay ang PTFOMS sa mga media worker na ginagampanan lamang ang kanilang tungkulin na i-ulat ang katotohanan sa bayan.
Kinikilala rin ng PTFOMS ang patuloy na panawagan para sa katarungan, lalo na mula sa mga pamilya ng mga biktima.
Nananatiling anilang nakatuon ang kanilang hanay sa pangako na lumikha ng isang ligtas na kapaligiran para sa lahat ng media practitioner, itaguyod ang rule of law, at ipagtanggol ang karapatang magkaroon ng isang malayang pamamahayag.
