Patuloy na bumababa ang paggastos ng pamahalaan para sa imprastraktura at iba pang capital outlays noong Setyembre.
Ito ay sa gitna ng mga pangamba kaugnay ng flood corruption scandal sa bansa.
Batay sa datos mula sa Department of Budget and Management o DBM, umabot lamang sa 78.7 billion pesos ang infrastructure spending noong Setyembre, halos apatnapu’t tatlong porsyento na mas mababa kumpara sa 137.1 billion pesos noong nakaraang taon.
Ayon sa DBM, kabilang sa mga dahilan ang pagkaantala o hindi pagsusumite ng billings ng mga contractor dahil sa patuloy na inspeksiyon ng mga implementing offices ng Department of Public Works and Highways o DPWH sa estado ng implementasyon at pagkumpleto ng mga proyekto sa buong bansa.
Sinabi ng kagawaran na naapektuhan ng mga pagkaantala ang pagproseso ng payment claims at aktwal na paglulabas ng pondo.
Binigyang-diin din ng departamento na ang pagbaba ay bunsod ng freeze order sa ilang bank accounts ng mga DPWH implementing offices na iniimbestigahan, gayundin ng masamang lagay ng panahon na nakaapekto sa pagpapatupad ng mga proyekto at nagdulot ng dagdag na pagkaantala at hirap sa distribusyon.
