Pinangalanan na ni Department of the Interior and Local Government (DILG) Secretary Benhur Abalos Jr. ang isa sa limang miyembro ng komite na magsasagawa ng pagsusuri sa courtesy resignations na ihahain ng mga generals and full colonels ng Philippine National Police (PNP).
Sinabi ito ni Sec. Abalos kasunod ng panawagan sa mga nabanggit na opisyal na maghain ng resignation, upang masolusyunan ang problema sa iligal na droga sa ahensiya.
Ayon kay Sec. Abalos, si Baguio City Mayor Benjamin Magalong ang isa sa mga magiging miyembro ng komite.
Napili si Magalong dahil sa taglay nitong integridad, kredibilidad at malinis na record.
Bagong maging alkalde ng Baguio City, si Magalong ay isang retiradong opisyal ng pulisya na dating namuno sa Criminal Investigation and Detection Group at nagsilbing deputy chief for operations ng PNP.
May basbas din ni Magalong ang pagsapubliko ni Abalos ng kaniyang pangalan bilang miyembro ng 5-man committee.
Sa ngayon, hindi pa pinapangalanan ni Abalos ang iba pang miyembro ng komite, para sa kanilang seguridad na tiniyak ng opisyal na may iba’t ibang background.