Inabswelto ng Las Piñas City Court ang anak ni Justice Secretary Jesus Crispin Remulla para sa kasong illegal drug possession.
Sa desisyong ibinaba ngayong araw, hinatulan ni Las Piñas City Regional Trial Court Branch 197 Judge Ricardo Moldez II, na not guilty si Juanito Jose Remulla III para sa paglabag sa section 11 ng Comprehensive Dangerous Drugs Act o Republic Act 9165.
Noong Oktubre a-11 nakaraang taon, naaresto ang nakababatang Remulla matapos makatanggap ng pakete na naglalaman ng siyamnaraang gramo ng kush o high grade marijuana na nagkakahalaga ng isa punto tatlong milyong piso.
Batay ito sa controlled delivery na isinagawa ng mga ahente ng Philippine Drug Enforcement Agency (PDEA) at NAIA Inter-Agency Drug Interdiction Task Group.
Nitong Miyerkules, Nobyembre a-kwatro unang naghain ng apelang not guilty si Remulla III.
