Nagpositibo sa Coronavirus Disease 2019 (COVID-19) ang isang balik-bayan na Overseas Filipino Worker (OFW) na taga-Cebu sa kabila na naturukan na ito ng bakuna na gawa ng Sinopharm mula China ayon sa ulat ng Department of Health Region 7.
Ayon kay DOH-Region 7 Spokesperson Dr. Mary Jean Loreche, nabakunahan na ng dalawang dose ng Sinopharm vaccine ang lalaking pasyente noong Disyembre 12, 2020 at nitong Enero 2 ngayong taon.
Batay sa ulat, mula sa United Arab Emirate (UAE) ang pasyente at dumating ito sa Mandaue City nitong Enero 5 at nakumpleto naman ang 14 days quarantine.
Samantala, nagpositibo rin ang lima sa pitong kasama sa bahay ng pasyente at kasalukuyan na itong mga naka-isolate.
Paliwanag naman ni Loreche, mayroon talagang mga posibilidad na magpositibo pa rin matapos mabakunahan dahil wala pang scientific basis kung hanggang kailan ang itatagal na immunity na maibibigay ng bakuna.
Aniya, tinitingnan din nila ang posibilidad na maaaring nahawaan ng bagong COVID-19 variant ang naturang pasyente.— sa panulat ni Agustina Nolasco
