Pinauwi na ni North Korean Supreme Leader Kim Jong-Un ang kanilang mga embahador mula sa iba’t ibang bansa para sa isang malaking pulong sa Pyongyang.
Kabilang sa mga pinauwi sina Ji Jae-Ryong, Ambassador to China; Ja Song-Nam, Ambassador to the United Nations at Kim Hyong-Jun, Ambassador to Russia.
Naniniwala ang South Korea na tatalakayin sa pulong ang susunod na hakbang ng Nokor matapos ang banta nitong magbabagsak ng missile sa U.S. Pacific territory na Guam.
Bagaman naka-antabay na ang Sokor, Japan at Amerika sa naka-umang na missile strike ng Nokor na posibleng isagawa ngayong araw, bahagyang kumalma ang sitwasyon.
Ito’y makaraang manawagan na si South Korean President Moon Jae-In sa Nokor maging kay U.S. President Donald Trump na maging mahinahon lalo’t ang Sokor ang unang maiipit sakaling sumiklab muli ang digmaan.
Tila pinakinggan din ng Nokor ang apela ng China na suspendihin ang anumang nuclear weapons development program nito matapos mamagitan si Chinese President Xi Jinping.
