RONDA PROBINSYA

Patay ang isang 82-anyos na lalaki matapos umanong hampasin sa ulo ng kanyang sariling anak kasunod ng mainitang pagtatalo sa Badian, Cebu.

Kinilala ang biktima sa alyas na “Ecio,” habang ang suspek ay ang kanyang 43-anyos na anak na tricycle driver na kilala sa alyas na “Acoy.”

Ayon sa pulisya, nagkaroon muna ng pagtatalo ang mag-ama bago nauwi sa karahasan ang insidente. Sinabi ng mga awtoridad na pinaghahampas umano ng suspek ang kanyang ama sa ulo gamit ang isang piraso ng kahoy.

Matapos ang insidente, nagsagawa ng hot pursuit operation ang mga pulis na nagresulta sa agarang pagkakaaresto sa suspek sa kanyang bahay.

Ayon sa mga awtoridad, posibleng maharap ang suspek sa kasong parricide. Patuloy pa ring inaalam ng mga imbestigador ang ugat ng kanilang pagtatalo.

Patay ang isang 51-anyos na magsasaka matapos umanong saksakin ng kanyang kapitbahay kasunod ng alitan tungkol sa Wi-Fi connection sa Ilagan City sa Isabela.

Ayon sa pulisya, nakarinig ang suspek na isang 37-anyos na construction worker ng mainitang pagtatalo sa pagitan ng biktima at asawa nito tungkol sa Wi-Fi connection.

Sa imbestigasyon, nagkasalubong umano ang dalawa at tinangka raw ng biktima na hampasin ang suspek gamit ang metal pipe. Dahil dito, bumunot umano ng bolo ang suspek at nasaksak ang biktima nang ilang beses.

Matapos ang insidente, nagtungo ang suspek sa bahay ng kanyang tiyahin at kusang sumuko sa mga awtoridad.

Patuloy ang imbestigasyon ng pulisya habang inihahanda ang mga kasong isasampa laban sa suspek.

Isang lalaki sa San Fernando, southern Cebu ang nahaharap sa kasong arson matapos umano niyang sunugin ang sarili niyang bahay.

Ayon sa pulisya, lasing umano siya nang mangyari ang insidente sa Barangay Panadtaran.

Batay sa imbestigasyon, may nakakita umano sa kanya na sinindihan ang kanyang bahay bago tumakas. Agad namang rumesponde ang mga kapitbahay at naapula ang apoy kaya hindi na ito kumalat sa ibang bahay.

Itinanggi ni Paradela ang paratang at sinabi niyang hindi niya maalala ang nangyari dahil sa sobrang kalasingan. Sinabi rin niyang kakauwi lang niya mula sa lamay at magluluto sana siya nang makita niyang may apoy na ang bahay.

Nasawi ang isang 28-anyos na babae matapos mawalan ng malay habang nakapila para sa ₱20 kada kilong bigas sa Bukidnon.

Sa imbestigasyon, maaga umanong pumila ang biktima, ngunit sa kalagitnaan ng pila ay bigla na lamang itong natumba at nawalan ng malay.

Agad naman siyang isinugod ng mga tao sa paligid sa ospital, ngunit idineklara siyang dead on arrival.

Batay sa death certificate ng ginang, problema sa puso ang ikinasawi niya na humantong sa atake sa puso.

Nanawagan naman ng tulong ang pamilya ng babae, lalo pa’t apat na anak ang naiwan at naulila ng biktima.