Nagpahayag ng pagkabahala ang Estados Unidos sa pag-shutdown ng ABS-CBN Network matapos ipag-utos ng National Telecommunication Commission (NTC) ang pagpapatigil ng operasyon nito.
Ayon kay State Department Spokeswoman Morgan Ortagus, ikinababahala nila ang sitwasyon ng ABS-CBN.
Aniya mahalaga ang papel ng independent media para sa pagkakaroon ng bukas na palitan ng impormasyon at ideya na importante sa malaya, masagana at ligtas na demokratikong lipunan.
Dagdag ni Ortagus, mahalaga rin ang tungkulin ng media sa pagsusulong ng public health lalo na sa gitna ng nararanasang pandemya sa coronavirus disease 2019 (COVID-19) sa buong mundo.
Magugunitang nagpalabas ng cease and desist order ang NTC laban sa ABS-CBN dahil sa napaso nito prangkisa na ilang beses ring naging laman ng tirada ni Pangulong Rodrigo Duterte.