Inamin ni dating Armed Forces of the Philippines (AFP) Chief of Staff General Hermogenes Esperon na nabuhayan sila ng loob sa mga balitang tutuloy pa rin sa 2016 presidential elections si Davao City Mayor Rodrigo Duterte.
Sinabi sa DWIZ ni Esperon na tiwala pa rin silang hindi aatras sa eleksyon si Duterte sa gitna na rin nang patuloy na panawagang pumalaot ito sa presidential elections.
“Nagbago na yata nakumbinse na, pero ako ay tuluy-tuloy pa ring nagungumbinse sa kanya, alam naman nating PDP-Laban ang partido ni Mayor Duterte at nanggaling din doon na bumisita ang ilang partido sa kanya at iba pang lider, may nababalitaan nga ako na ganyan na magkikita-kita, ako’y nabubuhayan din dahil kung matutuloy yan eh kaming mga supporters ay nakahandang sumama sa kanya, nalulungkot kami nung nag presscon siya pero hindi kami nawawalan ng pag-asa.” Pahayag ni Esperon.
Samantala, dumagsa ang mga supporter ni Davao City Mayor Rodrigo Duterte sa labas at paligid ng COMELEC.
Kasunod na rin ito ng ugung-ugong na itutuloy na ni Duterte ang pagtakbo sa 2016 presidential elections at sa katunayan ay inaasahan na ang pagpa-file ng coc ng alkalde anumang oras ngayong araw na ito.
Nasaksihan ng DWIZ patrol ang hindi magkamayaw na pagsigaw ng Duterte supporters sa pangalan ng alkalde at masaya anila sila dahil nagbago na ang isip nito at payag nang pumalaot sa presidential elections.
By Judith Larino | Karambola | Aya Yupangco (Patrol 5)
