Bukas umano sa posibilidad na magkasama muli sina Superstar Nora Aunor at Star For All Seasons Vilma Santos sa isang pelikula.
Ito’y ayon mismo sa dalawang living legends at icons ng Philippine showbiz.
Anila, walang problema sakanila na muli silang magkatrabaho.
Noong 1982 nang huling magkatrabaho ang dalawa sa pelikulang ‘T – Bird at Ako’ at una dito ay nagkasama na din sila sa ‘Ikaw Ay Akin’ noong 1978 kasama ang leading man nila na si Christopher de Leon.
Sinabi ni Nora, kung magkakaroon ng proyekto na katulad ng ‘T – Bird At Ako’ at tutugma sa kanila ay bakit hindi.
Habang ayon naman kay Vilma, sana ay mabigyan sila ng magandang script dahil aniya, hindi na sila bumabata at sa pamamagitan nito ay makakaasa sila na papanoorin ng mga tao ang kanilang pelikula.
Sina Nora at Vilma ay muling nagkasama sa entablado ng parangalan ng Ginintuang Bituin ng Pelikulang Pilipino sa PMPC Star Awards for Movies noong Linggo lamang.
