Naipadala na ang subpoena sa nasuspindeng hepe ng Bureau of Corrections (BuCor) na si Gerald Bantag.
Ito ay matapos masangkot si Bantag at ituring umanong mastermind sa pagpatay sa brodkaster na si Percy Lapid.
Ayon kay Senior Assistant State Prosecutor Charlie Guhit, sa huling address ni Bantag sa Caloocan naihatid ang subpoena, na layong pagpaliwanagin ang former BuCor official sa dalawang murder cases na inihain laban sa kaniya.
Ngunit nang puntahan ng process servers ng DOJ ang address, nalaman na hindi na nakatira sa Caloocan ang dating opisyal na kinumpirma mismo ng barangay chairman doon na si Chairman Roel Esmaña.
Sa ngayon, nasa PNP at NBI na ang pasya kung magpapalabas muli ng subpoena dahil ang dalawang ahensiya ang mga ito ang nakikipag-ugnayan sa Panel of Prosecutors.
