Kumikilos na ang Philippine National Police upang tumulong sa nagpapatuloy na imbestigasyon para matukoy kung ano ang sanhi ng nangyari pagguho ng ginagawang 9 na palapag na gusali sa Barangay Balibago sa Angeles City, Pampanga.
Ayon kay PNP Chief, General Jose Melencio Nartatez Jr., layon nito madetermina ang mga posibleng paglabag sa safety and building regulations sa nangyaring insidente.
Tuloy-tuloy anya ang kanilang pakikipag-ugnayan sa mga local authorities at emergency response units kasunod ng insidente.
Sinabi ng Heneral na halos 200 tauhan mula sa Police Regional Office 3 ang kanilang idineploy sa lugar upang umalalay sa rescue and retrieval operations, traffic management, at area security.
Maliban sa PNP, nagdeploy din ng mga tauhan ang Bureau of Fire Protection at Armed Forces of the Philippines.
Sa ngayon, nagpapatuloy ang rescue operations sa gitna ng hirap ng sitwasyon sa lugar dahil sa mga unstable debris at tuloy-tuloy na daloy ng kuryente na maaring maglagay sa panganib sa buhay ng mga rescuer. | Jopel Pelenio (Patrol 17)
