Iniimbestigahan na ng Philippine National Police (PNP) crime laboratory ang slug ng bala ng baril na kumitil sa buhay ng isang 12 anyos na dalagita sa Lanao Del Norte.
Ito’y makaraang tamaan ng ligaw na bala ang nasabing dalagita habang naglalaro lamang ilang oras matapos magpalit ang taon.
Ayon kay PNP Spokesman P/BGen. Ildebrandi Usana, partikular na tinututukan ng crime lab ang trajectory o ang pinagmulan ng bala at kung nakarehistro ang baril na pinanggalingan nito.
Kaya naman puspusan na rin ayon kay Usana ang ginagawang pakikipag-ugnayan ng lokal na pulisya sa lugar upang matukoy kung sino ruon ang kilalang nagmamay-ari ng baril na posible ring nasa likod ng indiscriminate firing.