Aarangkada na ngayong araw ang muling pagpapatupad ng bigtime rollback sa produktong petrolyo.
Ayon sa kumpaniyang Chevron Philippines Inc. Caltex, Flying V, Petron Corp., Pilipinas Shell Petroleum Corp., at Seaoil Philippines Inc., aabot sa P2.40 ang kada litro ng gasolina, P2.65 sa kada litro ng diesel habang maglalaro naman sa P2.70 ang tapyas presyo sa kada litro ng kerosene.
Inihayag naman ng kumpaniyang Cleanfuel, Petro Gazz, Phoenix Petroleum Philippines Inc., PTT Philippines Corp., at Unioil Petroleum Philippines Inc. na magpapatupad sila ng kaparehong adjustment sa presyo ng gasolina at diesel pero hindi dito kasama ang presyo ng kerosene.
Epektibo naman ang pagpapatupad sa presyo ng langis sa ilang kumpaniya alas-6 ng umaga ngayong araw maliban sa kumpaniyang Cleanfuel na magpapatupad ng alas-8 mamayang umaga at Caltex mamayang tanghali.
Ang tapyas-presyo sa produktong petrolyo ay nakabatay sa pagbabago sa gastos ng Mean of Platts Singapore o MOPS, na siyang naging basehan sa lebel ng pagpepresyo sa sektor ng langis.
Nabatid na ito na ang ikalimang rollback sa presyo ng produktong petrolyo mula noong nakaraang buwan at unang bawas naman sa gastos sa mga oil pump ngayong buwan ng Disyembre. —sa panulat ni Angelica Doctolero
