Kinuwestyon ni Senador Risa Hontiveros ang plano ni Pangulong Rodrigo Duterte na armasan ang mga barangay captain at tanod maging ang mga estudyanteng kasapi ng Reserve Officers’ Training Corps o ROTC.
Ayon kay Hontiveros, sa halip na dapat mapanatili ang kaayusan sa lipunan ay tila nais gawin ni Pangulong Duterte na “Wild, Wild West” ang sitwasyon ng bansa.
Hindi aniya solusyon sa kriminalidad ang pag-aarmas sa mga barangay official, mga miyembro ng ROTC, prosecutor, pari at iba pang sektor.
Sa panig naman ni Senator Panfilo Lacson, hindi anya ganun ka-simple at kadali ang nais ni Pangulong Duterte na armasan ang mga opisyal ng barangay.
Ipinunto ni Lacson na mayroong mga batas at proseso na dapat isaalang-alang bago ito maipatupad at kung sa gobyerno manggagaling ang mga baril ay dapat munang maipaloob sa general appropriations act na inaaprubahan ng Kongreso taun-taon.
Gayunman, kung ang mga barangay official naman mismo ang bibili ng kanilang baril ay kailangan nilang mag-apply ng lisensya at permit to carry firearms.