Pormal nang iniharap ang ikalawang testigo ng House Prosecution Panel sa nagpapatuloy na impeachment trial laban kay Vice President Sara Duterte.
Sa gitna ng paglilitis, nanumpa sa Senate Impeachment Court si Nenita Camposano, ang dating manager ng LandBank of the Philippines-DepEd Branch.
Si House Prosecutor at Manila Rep. Joel Chua pa rin ang nanguna para sa direct examination ng prosecution.
Sa gitna ng paglilitis, natalakay ang proseso ng encashment ng tatlong cheque sa DepEd Branch na nagkakahalaga ng P112.5 million.
Kinumpirma ni Camposano na ang bawat transaction ay nagkakahalaga ng mahigit P37.5 million, kung saan si Sonia De Leon, head ng Cash Division ng DepEd, ang tumatawag sa LandBank para sa pagpapalabas ng cash withdrawal.
Sa pagtatanong ni Chua, kinuwestiyon niya ang polisiyang ipinatutupad ng LandBank, partikular ang kakulangan sa pagkakakilanlan ng mga kumuha ng malalaking halaga ng pera.
Nilinaw ni Camposano na “unusual” sa mga ahensya ng gobyerno, partikular ang Department of Education o DepEd, na mag-withdraw ng malalaking halaga ng pera.
Ang direct examination ni Chua kay Camposano ay tumagal lamang ng halos sampung minuto.
Matapos ang direct examination, nagdesisyon na rin ang defense panel na hindi na magsagawa ng cross-examination.
Hindi na rin ikinasa ang redirect at recross-examination sa pagitan ng prosecution at defense team, dahilan para bigyan ng sapat na oras ang mga senator-judges para sa clarificatory question kay Camposano. | via Geli Mendez (Patrol 30)
