Sang-ayon si Senador Panfilo Lacson sa plano ng economic managers ng pamahalaan na itaas o doblehin ang pondo para sa subsidy sa transport at agricultural sector.
Kasunod ito ng walang-tigil na pagtaas ng presyo ng langis sa World Market.
Ayon sa senador, mayroong special provision sa ilalim ng 2022 budget na pinahihintulutan ito para mapigilan ang inflation.
May pagtaya aniya na aabot sa 3.7% ang inflation ngayong taon bagay na mas mataas sa acceptable level na 2%.
Sinabi naman ni senate president Pro tempore Ralph Recto na maaari namang isuspinde pansamantala ang excise tax upang bumaba ang presyo ng produktong petrolyo.
Maaari naman aniyang agad makapagpasa ng batas ang kongreso para sa suspensyon sa excise tax sa langis basta’t may kahilingan mula sa Malacañang.—mula sa ulat ni Cely Ortega-Bueno (Patrol 19)