Posibleng pahintulutan na ang mga Pilipino na lumabas ng bansa para makasama ang kanilang mga dayuhang asawa o partners na nasa ibang bansa.
Ayon kay IATF Vice Chairman at Cabinet Secretary Karlo Nograles, inaayos na lang ng pamahalaan ang iba pang detalye para masiguro ang mga Pilipinong lalabas ng bansa ay walang COVID-19.
Mababatid na ilan sa mga pinag-aaralang mabuti ng pamahalaan, ay kung anong klaseng test na ipagagawa sa mga Pilipinong lalabas ng bansa, at anu-ano ang mga certifications o patunay na kailangan nilang kunin bago umalis ng bansa.
Kasunod nito, nilinaw ni Nograles, na payag na ang IATF ‘in principle’ kaya’t oras na plantsado na ang lahat ng detalye at tsaka pa lamang nila ito ilalabas, dahil ayaw anila na magkagulo ang ilang mga nais lumabas ng bansa na hindi pa plantsado ang kautusan.
Magugunitang, nanawagan ang mga Pilipinong may dayuhang asawa o partners na payagan na silang makalabas ng bansa.
