Lantarang kinuwestiyon ng Quezon City Cares (QC Cares) at Globaltech Mobile Online Corporation ang legalidad ng naganap na public bidding ng STL (small town lottery) sa lungsod.
Ayon sa nakalap na impormasyon, ang kompanya na Lucent Gaming and Entertainment ang sinasabing idineklarang nanalo sa bidding sa kabila ng katotohanang wala itong sapat na pondo at kakayanan upang patakbuhin ang operasyon ng STL.
Isang umano’y nagngangalang Ronald Pagulayan ang tunay na nagmamay-ari ng Lucent o isang ‘One Person Corporation’ (OPC) na napapabalitang malapit na kamag-anak ni PCSO General Manager Royina Garma kung kaya’t matagumpay itong nailusot.
Bukod dito, napaulat na isang negosyante ang sumustento sa daily remittance ng operasyon mula Oktubre 2021 hanggang Pebrero 2022 sa kadahilanang walang tunay na kakayanan si Pagulayan na bayaran ang mga obligasyon niya sa gobyerno.
Nabatid na isang nagngangalang Procifena ang lumutang na nagbayad ng cash bond ng Lucent Gaming at nakipagkasundo umano kay Pagulayan sa pamamagitan ng isang Memorandum of Agreement (MOA) upang mailipat sa kamay nito ang aktwal na pangangasiwa ng STL.
Dahil dito, mariing kinondena ng QCares ang nasabing gawain sapagkat ito ay maituturing na isang subcontracting na direktang labag sa tuntuning nakasaad sa Revised Implementing Rules and Regulations (RIRR) ng PCSO. Kasabay nito, ipinanawagan ng grupo ang pagpapawalang-saysay sa pahintulot at awtoridad na iginawad sa STL operator.
Samantala, nagtataka naman ang Globaltech sa naging aksyon ng National Bureau of Investigation (NBI) sa isinagawa nitong mga aplikasyon sa korte para sa pag-iisyu ng search warrants laban sa Peryahan ng Bayan habang ito ay nasa proseso pa lamang ng arbitration.
Nagpahayag ng pagkabahala ang QCares sa operasyon ng STL sa lungsod sapagkat ito ay nagiging pangunahing kasangkapan para palaganapin umano ang iligal na sugal sa Quezon City sa kabila ng mas pinaigting na kampanyang isinasagawa ng QCPD sa ilalim ng pamumuno ni QCPD Director, PBGen Remus Medina.