Humarap sa NBI ang inaakusahang druglord na si Peter Lim bilang tugon sa kautusan ni Pangulong Rodrigo Duterte na linisin nito ang pangalan kung totoong wala itong kinalaman sa droga.
Pasado Alas 12 ng tanghali nang dumating sa NBI si Lim kasama ang kanyang abogado na si Attorney Ramon Esguerra sakay ng itim na SUV.
Tumagal nang higit 2 oras ang closed door meeting.
Sinabi ni Esguerra, nagtungo sa NBI si Lim upang makipagtulungan sa imbestigasyon matapos lumutang ang pangalan nito na sangkot sa iligal na droga sa bansa.
Bukod dito, nagsumite rin si Lim ng 2 pahinang Affidavit upang pabulaanan ang nasabing paratang.
Gayunpaman, tumanggi ang NBI na ibahagi ang nilalaman ng Affidavit ni Lim.
Samantala, inamin ni Esguerra na minsan nang naimbestigahan ng Kongreso si Lim kaugnay ng pagkakasangkot sa droga ngunit hindi naipursige ang imbestigasyon dahil sa kakulangan ng ebidensya.
By: Avee Devierte