Naniniwala si Pang. Ferdinand Marcos Jr. na masyado nang naabuso ang politika sa bansa, kaya niya sinusuportahan at isinusulong na priority bill sa Kongreso ang pagpasa ng panukalang Anti-Dynasty Bill.
Sa press briefing, sinabi ni Palace Press Officer at Communications Usec. Claire Castro na nakita ng Pangulo ang pagbabago sa political landscape ng bansa, na inaabuso ng ilang pulitiko, at pinapaikot ng mga ito ang batas.
Iginiit ni Pangulong Marcos ang kapangyarihan ng taumbayan na bumoto nang naaayon sa merito at hindi dahil sa magkapangalan o magkakapamilya.
Magugunitang sinabi ni Marcos noong tumatakbo siya sa pagka-Pangulo na wala siyang nakikitang mali at illegal sa political dynasty, dahil nakabatay pa rin sa performance ng mga opisyal ang politika.
Pero ayon kay Usec. Castro, nais ngayon ng Pangulo na araling mabuti ng Kongreso ang kahulugan ng dynasty, para hindi na lumala ang naobserbahang pang-aabuso sa politika ng ilang magkakamag-anak na nasa pamahalaan.
