Pormal nang pinagtibay sa Kamara ang House Concurrent Resolution Number 8 para sa implementasyon ng open bicam.
Pinangunahan ni House Deputy Speaker at La Union First District Rep. Paolo Ortega the Fifth ang pag-apruba sa resolusyon, na sinuportahan ng ilang mambabatas.
Layon nitong maitaguyod ang katapatan sa 1987 Constitution, na may kaugnayan sa tungkulin at responsibilidad ng conference committee tungo sa pagtiyak ng transparency at accountability sa pambansang pondo.
Una nang pinagtibay ng Senado ang isang kaparehong resolusyon upang matiyak na magiging bukas sa publiko ang pagtalakay ng bicameral conference committee sa panukalang 2026 National Budget.
Nagpasalamat naman si House Deputy Minority Leader Leila de Lima sa liderato ng Kamara at mga kasamahang mambabatas sa pakikinig sa panawagan ng publiko para matiyak na magiging patas ang deliberasyon ng bicam.
Napapanahon anya ito lalo na’t aararangkada na bukas ang pagsalang sa bicam ng pambansang pondo, na mahalagang hakbang tungo sa mas transparent na pambansang budget dahil magkakaroon na ng access ang publiko sa bicam proceedings.
Malaking tulong din ito upang maiwasang maulit ang mga iregularidad na bumalot sa bicam deliberations noong 2025 National Budget.
