Ipinaliwanag ni Atty. Domingo Cayosa, dating pangulo ng Integrated Bar of the Philippines (IBP), na maaaring mag-iba ang bilang ng boto na kailangan para sa conviction sa impeachment depende sa mga senador na aktuwal na lumalahok sa proceedings.
Ayon kay Cayosa, ang tinutukoy ng Konstitusyon na “members of the Senate” ay dapat unawain sa konteksto ng Senado bilang impeachment court. Kung hindi nakikibahagi sa paglilitis ang isang senador, hindi ito dapat isama sa bilang ng mga aktuwal na bumoboto.
Aniya, kung muling makikilahok sa proceedings ang isang senador na dati ay hindi nakadalo, maaari itong magkaroon ng pagkakataong bumoto. Gayundin, kung sakaling mabawasan ang bilang ng mga aktuwal na nakikilahok dahil sa hindi inaasahang pangyayari, mananatili ang two-thirds requirement batay sa mga miyembrong lumalahok.
Giit ni Cayosa, hindi nito binabago ang Konstitusyon kundi isang interpretasyon lamang sa paraan ng pagpapatupad ng two-thirds requirement sa impeachment court.
