Apat pang mambabatas ang nanawagan na imbestigahan sa Kamara ang US-led Pax Silica Initiative dahil sa posibleng epekto nito sa kapaligiran, ekonomiya, lipunan, at pamamahala.
Inihain nina Akbayan Party-list Representatives Percival Cendaña, Chel Diokno, at Dadah Kiram Ismula, kasama si Dinagat Islands Rep. Kaka Bag-ao, ang resolusyong humihiling ng pagdinig hinggil sa inisyatibo at sa panukalang Economic Security Zone.
Layunin ng resolusyon na atasan ang Bases Conversion and Development Authority, Board of Investments, Department of Foreign Affairs, at iba pang ahensya na magsumite ng mga dokumento at kasunduang may kaugnayan sa Pax Silica at sa panukalang economic zone.
Makatutulong anila ang mga pagdinig sa pagbuo ng mga batas upang matiyak na anumang partisipasyon sa Pax Silica Initiative ay direktang mapapakinabangan ng bansa habang pinoprotektahan ang mga manggagawa, kababaihan, komunidad, at kapaligiran.
Magugunitang itinampok ni Pangulong Ferdinand Marcos Junior sa kaniyang ika-limang State of the Nation Address noong Lunes ang Pax Silica at sinabing magtatatag ito ng “advanced manufacturing and logistics center” na lilikha ng trabaho at magpapalakas sa ekonomiya.—sa panulat ni Mark Terrence Molave
