Nagpaabot na ng pagbati si Pangulong Rodrigo Duterte bago pa man magtapos ang taon.
Sinabi ng Pangulo na hangad niya ang kasayahan ng mga Pilipino sa pagsalubong sa 2017.
Ayon sa Presidente, hangad din niyang magkaroon ng pagbabago sa bansa dahil marubdob ang hangarin nitong maiangat ang buhay ng mga Pilipino.
Huwag na lamang aniyang pansinin ang kanyang pagmumura dahil naging bahagi na ito ng kanyang karakter at sa halip, tulungan siyang maisulong ang mga pagbabago sa bansa.
Sinabi pa ng Pangulo na gustuhin man niyang maging malambot, hindi aniya maaari dahil mayroon siyang tungkulin na linisin ang korapsiyon, kriminalidad at illegal na droga.
Tiniyak ng Punong Ehekutibo na gagawin niya ang lahat para madama ng mga Pilipino ang ipinangakong pagbabago sa bansa at sa buhay ng mga Pilipino.
By: Meann Tanbio / Aileen Taliping
