Balik ang street dance at float parade sa pagdiriwang ng Panagbenga Festival sa Baguio City sa susunod na taon.
Ayon sa Baguio city government, itinakda sa February 25, 2023 ang grand street dance parade at isasagawa kinabukasan ang grand float parade.
Sinabi ni Baguio City mayor Benjamin Magalong na ibabalik nila sa selebrasyon ng Panagbenga festival 2023 ang lahat ng mga nakaugaliang gawin sa nasabing event na huling idinaos noong 2019.
Tiniyak naman ni Anthony De Leon, chairman ng executive committee ng BFFFI o Baguio Flower Festival Foundation Incorporated ang pakikipag ugnayan sa local government para maayos ang inaasahang trapiko sa pagbabalik ng Panagbenga festival na bubuksan sa February 1, 2023 at matatapos sa March 5 sa pamamagitan ng isang grand aerial fireworks display.
Una nang inilunsad ang Panagbenga festival 2023 sa isang seremonya na may temang: A Renaissance of Wonder and Beauty.
