Sa ayaw at sa gusto, si Davao City Mayor Rodrigo Duterte na ang itinalagang standard bearer ng partidong PDP-Laban.
Ito’y matapos tuluyan nang i-atras ni Volunteers Against Crime and Corruption Chairman Martin Diño ang kaniyang kandidatura sa pagka-Pangulo.
Una rito, nagpadala ng motu propio ang COMELEC legal department kay Diño na nagsasabing siya’y nuisance candidate at walang kapasidad na magsagawa ng pambansang kampaniya.
Sinabi ni Diño sa isang panayam na labis siyang nasaktan at nainsulto sa naging pasya ng COMELEC hinggil sa kaniyang kandidatura.
Gayunman, inihayag ng Executive Assistant ni Duterte na si Christopher Go na nananatili ang posisyon ni Duterte na hindi siya tatakbo sa pagka-Pangulo at wala sa kaniyang isipan ang maging pangulo ng bansa.
Magugunitang inihayag naman ni Duterte sa panayam sa kaniya ng CNN Philippines na kaniyang susundin ang anumang magiging kapasyahan ng partido sakaling madiskuwalipika si Diño bilang standard bearer nito.
Matunog ang balitang magiging presidentiable si Duterte sa pamamagitan ng substitution.
By Jaymark Dagala