Kumpiyansa si Senate President Koko Pimentel na ganap nilang maisasabatas ngayong buwan ang panukalang TRAIN o Tax Reform Acceleration and Inclusion Bill at ang panukalang pambansang pondo para sa susunod na taon.
Iyan ang pagtitiyak ng Senate President sa kabila ng mga naging pagbabago sa kanilang kalendaryo bunsod ng ginawang pagho-host ng Pilipinas para sa ASEAN Summit ngayong taon.
Sinabi ni Pimentel na magiging maghapon ang kanilang sesyon para sa period of amendments para sa TRAIN Bill at sisikapin nilang maipasa ito sa 3rd and final reading ngayong araw o hanggang bukas.
Habang sa Lunes ng susunod na linggo naman aniya nila target maipasa sa 2nd at 3rd reading ang panukalang budget na posibleng abutin pa hanggang sa Miyerkules, Nobyembre 29.
