Umaasa ang Malakaniyang na agad aaksyunan ng Office of the Ombudsman ang mga isinampang kaso laban sa ilang miyembro ng gabinte ni dating Pangulong Noynoy Aquino hinggil sa maanomalyang kontrata nito para sa MRT Line 3.
Ayon kay Presidential Spokesman Harry Roque, hangad nilang makita ng Ombudsman ang kalbaryong dinanas ng taumbayan sa ilalim ng palpak na sistemang inilarga ng nakalipas na administrasyon gayundin sa kamay ng BURI.
Dapat lamang aniyang papanagutin ang mga taong nasa likod ng pagpapahirap sa publiko dahil sa kabiguang maihatid ng tama ang kinakailangang serbisyo gayung sa buwis kinukuha ang ginagastos at pinang-babayad sa mga dapat sana’y nangangalaga sa mrt.
Ganito rin ang reaksyon ni Senate Committee on Public Services Chairperson Grace Poe na nagsabing dapat na tutukan ng Ombudsman ang pinasok na kontrata dahil sa anito’y tadtad ng anomalya na ang kapalit ay puro pahirap sa masa.
