Nagkaisa ang mga Senador na suportahan ang naging pagpapasya ni Pangulong Rodrigo Duterte na palawigin pa ang enhanced community quarantine (ECQ) sa Metro Manila at ilan pang lugar na itinuturing na high risk areas sa coronavirus disease 2019 (COVID-19).
Ayon kay Sen. Panfilo Lacson, malayo pa ang lalakbayin ng Pilipinas para tuluyang mapababa ang naitatalang kaso ng COVID-19 sa bansa subalit malaki aniya ang naitutulong dito ng pagpapatupad ng ECQ.
Para naman kay Sen. Ralph Recto, inaasahan na niyang ganito na ang magiging pasya ng Pangulo kaya’t kaniyang iminungkahi na pagtuunan ng pansin ang mass testing para ma-isolate na at magamot ang lahat ng apektado ng nasabing virus.
Sa panig naman ni Sen. Sonny Angara, pinairal lang ni Pangulong Duterte ang pagiging ama nito sa bansa nang ikonsidera nito ang kapakanan ng mga Pilipino na itinuturing din nito bilang anak.
Makatuwiran din ayon kay Sen. Aquilino “Koko” Pimentel III ang pasya ng Pangulo pero kailangang matiyak na mayroong sapat na kagamitan at pasilidad para matugunan agad ang mga nahawaan ng sakit dulot ng virus.
Suportado rin maging ni Minority Senator Francis “Kiko” Pangilinan ang pasya ng Pangulo subalit hiniling nito na dapat lalo pang paigtingin ang testing, contact tracing at proteksyon sa mga health frontliners.
Una rito, sina Senate President Vicente “Tito” Sotto III at Christopher Lawrence “Bong” Go ang siyang mga direktang nagrekomenda sa Pangulo na palawigin pa ang ECQ partikular na sa NCR dahil marami pa rin ang naitatalang kaso rito ng virus.
