Dalawang pharmaceutical company ang iniimbestigahan ngayon ng National Bureau of Investigation o NBI dahil umano sa pagbebenta ng gamot na Remdesivir na ginagamit sa mga dinapuan ng COVID-19.
Ayon kay Atty. Bernard Dela Cruz, pinuno ng NBI Special Task Force may mga nahuli silang nagbebenta ng Remdesivir at sa dalawang pharmaceutical companies umano na ito nila kinukuha ang gamot.
Ilan sa mga nahuling suspek aniya ay nagpapakilalang medical representative ng Pharma companies habang ang isa sa mga nahuli ay isa umanong pharmacist.
Kinilala ang ilan sa mga nahuli na si Maria Christina Manaig, Christopher Boydon, Philip Bales at Bernard Bunyi na naaresto sa West Avenue Quezon City, kahapon.
Sinabi naman ni NBI Spokesman Ferdinand Lavin bukod sa delikadong ibenta ang Remdesivir, overpriced pa itong ibinebenta ng mga suspek.
Nahaharap ang mga suspek sa kasong paglabag sa Food Administration Act of 2009 at Philippine Pharmacy Act.
Magugunitang naging talamak ang bentahan sa online ng naturang gamot na ipinagbabawal ng FDA at tanging mga ospital na may compassionate use permit lamang ang maaaring magbigay nito.