Hinigpitan ng lokal na pamahalaan ng Navotas ang travel requirements sa mga residenteng mula sa mga lugar na nasa labas ng NCR Plus.
Ayon kay Mayor Toby Tiangco, ito ay upang matiyak ang kaligtasan ng mga mamamayan laban sa COVID-19.
Sa inilabas na anunsyo ng lokal na pamahalaan, kinakailangang mag-register sa s.pass.ph at magsumite ng health declaration o medical certificate na i-nisyu ng municipal health office kung saan manggagaling ang isang byahero.
Kailangan rin na nakasaad dito na hindi sila Covid-19 Patient, suspected o probable case, at dapat na negatibo ang resulta ng RT-PCR test.
Maliban dito, kailangan rin ng certificate mula sa barangay na pinanggalingan na nagsasabing hindi kasama ang byahero sa listahan ng mga kailangang sumailalim sa quarantine o nakakumpleto ng itinakdang quarantine period.
At panghuli ay dapat rin na tukuyin ng biyahero ang kumpletong address ng destinasyon sa Navotas City. —sa panulat ni Hyacinth Ludivico