Nagkasa na ng sarili nitong imbestigasyon ang Internal Affairs Service (IAS) ng Philippine National Police (PNP) sa pagkamatay ng dating sundalo na si Cpl. Winston Ragos sa kamay ng isang pulis sa Quezon City.
Ayon kay PNP IAS Inspector General Atty. Alfegar Triambulo, kaniya nang inatasan ang Regional-IAS ng NCRPO na alamin kung may pagkakamali o pagkukulang sa panig ng mga pulis na nagresulta sa pagkasawi ni Ragos.
Kasama aniya sa iimbestigahan ng IAS ang tumayong ground commander o immediate supervisor ni P/Msgt. Daniel Florendo dahil sa usapin ng command responsibility.
Una nang nagkasa ng sarili nilang imbestigasyon ang Criminal Investigation and Detection Unit (CIDU) ng Quezon City Police District (QCPD) at ang Philippine Army hinggil sa insidente.
