Tiwala ang mga kapwa kandidata ni Teresita Ssen “Wynwyn” Marquez sa Ms. World Philippines 2017 na magiging patas ang mga hurado.
Ayon kay Iloilo Candidate Jeanyfer Ozbot, matindi ang kanyang naramdamang kaba dahil mga modelo, mga beterana sa pageant at celebrity katulad ni Wynwyn ang kaniyang mga kalaban.
Gayunman, naniniwala si Jeanyfer na mas kinakabahan umano si Wynwyn dahil sa pressure na nararamdaman nito.
Ito aniya ay dahil malamang ay marami ang nag-aabang at umaasa kay Wynwyn na makukuha nito ang korona.
Samantala, nakatakda namang ganapin ang coronation night ng Ms. World Philippines 2017 sa Setyembre 3 sa Mall of Asia Arena sa Pasay City.
Bukod naman sa Miss World Philippines crown ay pag-aagawan din ng 35 kandidata sa naturang beauty pageant ang mga titulong Miss Eco International Philippines; Miss Multinational Philippines at Miss Reina Hispano-Americana Filipinas.
