Umaabot na sa 19 na senador ang miyembro na ng super majority na sumusuporta kay Senador Koko Pimentel bilang senate president.
Ayon kay Pimentel, sumama na rin sa super majority ang tatlo sa apat na senador na kagrupo ni Senador Alan Peter Cayetano na sina Senador JV Ejercito, Juan Miguel Zubiri at Richard Gordon.
Ipinabatid ni Pimentel na nagkausap na sila ni Cayetano noong Martes ng gabi kung kailan hiniling ni Cayetano na unahing asikasuhin ang tatlong kasamahan niya.
Sinabi ni Pimentel na inaasikaso na niya ang committee chairmanship na ibibigay kina Ejercito, Zubiri at Gordon.
Handa aniya siyang ibigay kay Cayetano ang Chairmanship ng blue Ribbon Committee kung aanib na ito sa super majority.
Lumagda na rin sa resolusyon si Senador Joel Villanueva samantalang hindi pa lumalagda sina Senador Ralph Recto, Cynthia Villar, Francis Escudero, Antonio Trillanes at Cayetano.
By Judith Larino | Cely Bueno (Patrol 19)
