Nakatakdang magpulong ang Metro Manila Council (MMC) para konsultahin ang mga eksperto hinggil sa pagluluwag ng quarantine age restrictions sa kalakhang Maynila.
Ito’y makaraang i-anunsyo ng Malakaniyang ang pagpayag ng Inter-Agency Task Force (IATF) na makalabas ng kanilang mga tahanan ang mga nasa edad 10 taong gulang pataas simula Pebrero a-primero.
Ayon kay MMC Chairman at Parañaque City Mayor Edwin Olivarez, nagkakaisa ang Metro Mayors na pagbawalan pa ring lumabas ng bahay ang mga nasa edad 17 pababa kung hindi mahalaga o essential ang kanilang lakad.
Giit ni Olivarez na bagama’t may pagkakataong papayagang makalabas ng bahay ang mga nabanggit nasa nabanggit na edad, hindi pa rin ito papapasukin sa mga mall.
Kasi alam natin yung mga bata, ‘yan yung mga tinatawag na super spreader kasi nga sila ay asymptomatic, walang sintomas na lumalabas ‘yon, malakas yung immune system nila pagdating sa mga bahay n’yan, pagyakap sa mga lolo at lola makakahawa ‘yan. So, ayan yung mga tinitignang avenue ng ating Metro Manila Council kaya sa Monday, Tuesday night magkakaroon ng meeting yung ating health experts,” ani Olivarez.
Binigyang diin pa ng akalde na lalo pang hihigpitan ng Metro Mayors ang mga ordinansa sa pagpapatupad ng health protocols.
Samantala, sinabi pa ni Olivarez na makabubuting manatili muna sa general community quarantine (GCQ) ang Metro Manila hanggang sa tuluyan nang mailabas sa publiko ang mga bakuna kontra COVID-19.
Iilang buwan na lang, iilang linggo na lang dadating ang ating vaccine bakit hindi natin hintayin na ‘yan, bago natin luwagan talaga pati para yung mga bata payagan na nating lumabas after ng ating vaccine na magkaroon tayo ng herd immunity na tinatawag, ibig sabihin kahit hindi ma-vaccine yung mga bata pero majority ng ating community ay maba-vaccine magkakaroon tayo ng herd immunity kung tawagin wala naman tayong surge o spike nung ating COVID pero kinatatakutan natin ay yung bagong variant,” ani Olivarez.