Ikinakasa na ng Pamahalaang Lungsod ng Taguig ang kanilang 4 na mega-quarantine at 40 Community centers para gawin bilang vaccination hub.
Ito ang inihayag ni Taguig City Mayor Lino Cayetano kasunod ng kanilang paghahanda para sa roll-out ng mga binili nilang bakuna kontra COVID 19 sakaling dumating na ito.
Ayon kay Cayetano, magkakaroon sila ng scheduled dry-run sa mga susunod na araw na sasaksihan ng mga kinatawan mula sa Inter-Agency Task Force o ITAF at iba pang ahensya ng Gobyerno.
Paliwanag pa ng Alkalde, ang 40 Community centers na kanilang gagawing vaccination hub ay ang mga Paaralan sa lungsod na may maayos na pakikipag-ugnayan sa kanilang lokal DepEd.
Ilan sa 4 na mga Mega Quarantine Facilities na gagawin din nilang vaccination hub ay ang nasa Lakeshore complex sa Brgy. Lower Bicutan.
Pagtitiyak pa ni Cayetano, handa na ang kanilang mga logistical requirement para sa pagdating ng kanilang mga biniling bakuna sa kanilang lungsod hanggang sa tuluyan na itong ipamahagi sa kanilang mamamayan.