Nadiskubre ng isang pag-aaral na nakararanas ng pressure ang mga estudyanteng Pilipino sa kolehiyo na maging perpekto, na maaaring mag-resulta sa mahinang quality of life.
Ayon sa isang pag-aaral na nailathala sa international journal na “Anxiety, Stress, & Coping,” nakaugnay ang “socially prescribed perfectionism,” o ang paniniwala ng isang indibidwal na inaasahan siyang maging perpekto ng kaniyang mga magulang, guro o propesor, mga kaklase at ka-edadan, at iba pang tao, sa mga problema sa mental health ng mga estudyanteng Pilipino; at isa itong aggravating factor sa kontekstong Pilipino.
Kabilang sa mga researcher na nagsagawa ng pag-aaral si Jeryl Shawn Tan ng University of the Philippines Diliman Psychology Department.
Nabatid na ang naturang pag-aaral ang unang beses na ginamit sa Pilipinas ang two-by-two model of perfectionism, kung saan sinusuri kung “self-oriented perfectionism” o “socially prescribed perfectionism” ang umiiral sa bawat estudyante sa aspeto ng well-being at coping strategies.
Umaasa ang mga mananaliksik na makatutulong ang kanilang pag-aaral sa mga paaralan, mental health professional, at mga pamilya upang maintindihan ng mga ito ang iba’t ibang uri ng perfectionism at kung papaano ito nakaaapekto sa mga estudyanteng Pilipino sa mga higher education institutes. | Sa panulat ni Anjo Riñon
