Hinimok ng Department of Labor and Employment (DOLE) ang mga employer na huwag markahang absent ang mga empleyado nilang lalahok sa “Bakunahang Bayan.”
Batay sa Labor Advisory no. 24, sinabi ni Labor secretary Bienvenido Laguesma na dapat na ituring ng mga employer na excuse sa trabaho ang mga empleyadong magpapabakuna o ‘di kaya’y sasamahan lamang ang kanilang mga anak para magpabakuna.
Hindi rin dapat ituring na absent ang mga empleyadong nakararanas ng adverse vaccine-related effects gayundin ang mga empleyadong kailangang alagaan ang kanilang mga anak na nakaranas ng adverse effects matapos mabakunahan.
Sakop ng naturang advisory ang mga empleyado mula sa mga pribadong kumpanya.
Ang nasabing guidelines ay inilabas ng ahensya bilang suporta sa ikinasang bakunahang bayan: special vaccination days ng pamahalaan na idinaos mula Disyembre a-5 hanggang ngayong araw, Disyembre a-7.