Saklaw din ng ipinatupad na travel ban ang mga dayuhang napadaan lamang ng China at iba pang special administrative regions nito tulad ng Hong Kong para sa layover o stopover ng eroplano.
Ito ang nilinaw ng Bureau of Immigration (BI) sa gitna na rin ng mas pinaigting at pinalawig pang travel ban para mapigilan ang pagkalat ng 2019 novel coronavirus acute respiratory disease (nCoV-ARD) sa Pilipinas.
Ayon kay Immigration Spokesperson Dana Sandoval, agad na ininspeksyon ng kanilang mga opisyal ang pasaporte ng mga dumarating na dayuhan sa paliparan para makita hindi lamang ang huling pinanggalingan nitong bansa o lugar.
Gayundin aniya ang travel history ng mga dayuhan sa huling 14 na araw.
Kahit po ‘yung mga nagtransit na passengers, halimbawa po nanggaling po sa ibang bansa at nag-land po sa Hong Kong, sa China, sa Macau para po magpalit ng eroplano, connecting flight or magrefuel, automatic po, they will not be allowed to enter the Philippines,” ani Sandoval.
Dagdag ni Sandoval, katuwang din nila sa pagpapatupad ng travel ban ang mga airline at shipping companies.
Una nang ipinatupad ng mga kinauukulang ahensiya ng pamahalaan ang travel ban sa mga biyaherong magmumula ng China, Hong Kong at Macau, gayundin ang pagbiyahe ng mga Pilipino patungo sa mga nabanggit na lugar.
On the airline side pa lang po marami na po ang nagcancel na mga flights na papunta po dito, palabas po ng bansa papunta do’n sa areas of concerned. So, malaking bagay na po ‘yon, we also sent out notices po sa airlines and shipping to assess their passengers bago pa po sila i-board para po makita kung meron na silang travel history do’n sa China, Hong Kong and Macau within the last 14 days para hindi na po aabot na kailangan pa pong pabalikin,” ani Sandoval.
