Naghain ng panukala ang Makabayan bloc sa Kamara para hilingin ang pagkakaloob ng Filipino citizenship sa Australian missionary na si Sister Patricia Fox.
Ayon kay Bayan Muna Representative Carlos Zarate, isa sa mga may-akda ng House bill 7806, ang pagbibigay ng Filipino citizenship kay Fox ay bilang tugon na rin sa panawagan ng mga natulungan nitong magsasaka, mangingisda at mga indigenous people.
Iginiit ni Zarate, marapat lamang na bigyan na ng Filipino citizenship si Fox dahil sa paglilingkod, pag-unawa at pagyakap nito sa mga kultura ng mga marginalized people sa bansa sa loob ng dalawampu’t pitong taon.
Tinanggap na rin aniya ng Filipino community si Fox hindi lamang dahil sa pagiging matatas nito sa wikang Filipino kundi dahil naging kaisa nila ito sa hirap ng pamumuhay.
Dagdag ni Zarate, dapat kilalanin at pasalamatan pa ng pamahalaan si Fox dahil sa pagsasakripisyo at walang pag-iimbot na paglilikod nito sa mga Filipino, sa halip na usigin at ipatapon palabas ng bansa dahil sa ng mga pekeng akusasyon.
Magugunitang, kinansela ng Bureau of Immigration ang missionary visa at ipinag-utos ang pagpapadeport kay Fox matapos umanong sumama sa isang political rally.
